HIJAR YAAD

Hijar/Yaad ( Separation )

        Ibteda woh thi keh jeena tha mohabbat mein mohaal

        inteha yeh hai keh ab marna bhi mushkil ho gaya          ( Jigar )

        [ Ibteda = begining , mohaal = difficult, inteha = end/limit]

        **********

        Tere firaq ki ratein kabhi na bhoolein gi

        maze mile unhi raaton mein umar bhar ke mujhe             ( Nasir )

        [ Firaaq = separation]

        **********

        Aa andaleeb mil kar kareN aah-wuzaariyaN

        tu haai gul pukaar maiN chillauN haai dil      

        [andaleeb - bulbul  aah-wuzaari - mourning, gul = flower]

        **********

        BichaDte lamhe badi der tak woh roya tha

        woh is se baDh kar mera eitraaf kya karta

        [ eitraaf = to except/to acknowledge ]

        **********

        Ek meri dua ek khuwaab tera donoN ka muqaddar yaksaaN tha

        taseer kabhi mil na saki, ta'beer sada maadoom rahi

        [ taseer = effect, ta'beer = interpretation, maadoom = absent ]

        **********

        Gham-e-zindagi gham-e-bandagi gham-e-do jahaN gham-e-jaavedaN

        meri nazar teri muntazir, teri har nazar mera imtehaaN

        [ bandagi = worship, gham-e-do-jahan = problems of both world

          javeedan = eternal]

        **********

        Haqeeqat khul gai Hasrat tere tark-e-mohabbat ki

        tujhe to ab woh pehle se bhi baDh kar yaad aate haiN     ( Hasrat Mohaani )

        [tark - to give up/to leave ]

        **********

        Jis qadar maiN ne miTaae teri yaadoN ke naqoosh

        dil-e-betaab ne utna hi tujhe yaad kiya     

        [ naqoosh = Mark]

        **********

        Khushak veeraaN aaNkhoN meiN ab to aaNsu bhi nahi

        kuch to hota jise ishq ka haasil khete

        [ haasil = gain ]

        **********

        Koi aisa ahal-e-dil ho keh fasaana-e-mohabbat

        maiN use suna ke rouN woh mujhe suna ke roe

        **********

        Khafa agar-cheh hamesha huye magar ab ke

        woh barhami hai keh ham se unheN gile bhi nahi

        [ barhami = anger, gile = complaints]

        **********

        Khushi ki rut ho yaa gham ka mausam nazar use DhooNDti hai har dam

        woh buye-gul tha keh naghma-e-jaaN mere to dil me utar gaya woh

        [ buye-gul = fragrance of flower, naghma-e-jaaN = song of life]

        **********

        Firaaq-e-yaar qayaamat se kam nahi Faraaz

        na din ko chain aata hai na raatoN ki neend aati hai     ( Faraaz )

        [ Firaaq = separation]

        **********

        Yaad aati hain jab teri baaten

        hum kaleja pakad kar rote hain                           ( Josh )

        **********

        MaaNga kareNge ab se duaa hijar-e-yaar ki

        aakhir ko dushmani hai dua ko asar ke saath              ( Momin )

        [ asar = effect ]

        **********

        Muddat ke baad aaj use dekh kar Muneer

        ek bar to dil DhaDka magar phir saNbhal gaya             ( Muneer Niyazi )

        **********

        Hijar mein aah-o-bukaa rasm-e-kuhan hai lekin

        aaj yeh rasam bhi dohraao ke kuch raat kate              ( Nasir )

        [aah-o-bukaa = crying/mourning rasm = custom/tradtion, kuhan = old]

        **********

        Gar zindagi mein mil gaye phir ittefaaq se

        puchenge apna haal teri bebasi se hum                     ( Saahir )

        [ bebasi = helplessness]

        **********

        Na cheD ai nikhat-e-baad-e-bahari raah lag apni

        tujhe athkheliyaN sujhi haiN, hum bezaar baithe hain     ( Zauq )

        [ nikhat = fragrance, baad = wind, bahar = spring,

          athkheliyaN = mischief ( sharaarat) ]

        **********

        Yahi mizaaj hai apna kisi ka dil na dukhe

        judaaiyoN ko bhi chaaha hai qurbatoN ki tarha

        [ qurbatoN = together ]

        **********

        Yeh qurbateN hi wajha-e-firaaq thehri haiN

        bahut azeez haiN yaaraan-e-bewafa mujh ko

        **********

        Har raat apne ghar ke chiraagoN ko bujha deta huN

        bas ek uski yaad hi kaafi hai dil ko jalaane ke liye

        **********

        Dil dukhaata hai woh mil kar bhi, magar aaj ki raat

        usi be-dard ko le aao ke kuchh raat katey

        **********

        Tujhe mile bhi to aankhen tujhe na dekh sakeeN

        nazar meiN ghoom rahi theeN judaaiyaaN teri              ( Firaq Ghorakhpori )

        **********

        hijr ki shab hai aur ujaala hai

        kiya tasav'vur bhi lutne vaala hai                       ( KHumaar Barabanqvi )

        **********