SELF PRAISING

Self Praising

        Safar taweel sahi guftagu maze ki rahi

        woh khush mizaj agar tha to Meer maiN bhi na tha         ( Faraaz )

        [taweel = long ]

        **********

        Woh to kuch ho hi gai tum se mohabbat warna

        hum woh khudsar haiN ki apni bhi tamanna na kareN

        **********

        Jo paa saka na tujh ko, to kho diya khud ko

        yeh mera ujaz bhi hai yeh mera kamaal bhi hai

        [ ujaz = modesty/simplicity, kamaal=excellence]

        **********

        Qais ka naam suna hoga ham se bhi mulaakaat karo

        ishq-o-junuN ki manzil mushkil sab ki yeh auqaat kahaaN

        [ Qais = MajnuN, auqaat = status/position]

        **********

        Raaz ke raaz ka samjhna koi aasaaN nahi

        pehle utar mere ashaar ki gehraai mein                   ( Raaz )

        **********

        tar-daamani pe shaikh hamari na jaayio

        daman jo nichoden to frishtey vazu kareN                 ( Daagh )

        [ tar = wet, daaman = corner of shirt, tar-daamani= getting drunk]

        **********

        HaiN aur bhii duniyaa mein sukhanavaar bahut achchhe

        kahate hain ki Ghalib kaa hai andaaz-e-bayaaN aur        ( Ghalib )

        **********

        Zikar us pari-wash ka aur phir bayaaN apna

        ban gaya raqeeb, jo tha raazdaaN apna                      ( Ghalib )

        [ pari-wash = beaitiful as fairy, bayaaN = description,

          raqeeb = rival, raazdaaN  = one sharing secret]

        **********

        Rok sakta hameiN zidaaN-e-balaa kya Majrooh

        hum to aawaz haiN deewaroN se chan jaate hain            ( Majrooh )

        [ zindaaN = prison, balaa = problems, chan jaana = to filter out]

        **********

        Mera khat usne paDha, paDh ke naama-bar se kaha

        yehi jawaab hai is ka koi jawaab nahi                    ( Insha)

        [ naama-bar = messanger]

        **********

        Pehle nigaahe-e-deed to paida kare koi

        phir hamse milne ki tamanna kare koi

        [ nigaah = sight , deed = to see]

        **********

        Maana ke aap ki nazroN maiN kuch bhi nahi haiN hum

        pucho unse hamari qadar jinhe haasil nahi haiN hum

        [ Qadar = value]

        **********

        Farishta mujh ko kehne se meri tahqeer hoti hai

        maiN masjood-e-malaayak huN mujhe insaaN rehne do

        [ tahqeer = insult, masjood-e-malaayak = prostrated by angles ]

        **********

        Kahaani apni, roo-daad-e-jahaan maaloom hoti hai

        jo sunta hai usi ki daastaan maaloom hoti hai            ( Seemaab )

        [ roo-daad = an account of events]

                                         **********

        Tumhaare aastaaN ko aastaaN hum ne banaaya hai

        agar hum sar uThaa leiN, aastaaN baaqi na reh jaaye

        **********

        be-rabt bhi naheeN hai, baa-rabt bhi naheeN hai

        zaalim ki guftugoo meiN andaaz haiN GHazal ke!           ( Ghulam Rabbani TaabaaN )

        **********